喺香港，愈來愈多人租用 迷你倉 ，為求有更多空間去放置物品，因為好多人都住喺面積唔大嘅蝸居入面，家居冇乜地方可以做儲存。但係，係咪每一個人都需要用迷你倉呢？咁又未必。有啲人租咗之後，並唔係用得其所，咁變相只係浪費金錢！不如大家先了解一下，喺乜嘢情況之下你需要租倉？
需要租用迷你倉的情況
1）裝修／搬屋／買樓賣樓
當你需要由一間屋搬去另一間屋，無論係因為租約期滿要搬去另一新盤，抑或係你買咗新樓、賣咗舊樓，又或者你間屋需要大裝修，迷你倉都係一個過渡期嘅物品儲存方案。市面上，你想短期租一個空置單位唔係咁易搵，但係迷你倉你可以一個個月咁租，有彈性得來，租用面積都可以大小隨意。
2）需要額外儲存空間
呢樣唔使多講，香港人居住面積細，但好多都有購物習慣，屋企唔夠位係常見問題。講緊嘅無論係衣物、書籍、玩具、精品等，好多人都買到一屋都係，搞到間屋冇晒空間感。而唔係咁多人有能力搬去一間大啲嘅屋，所以其中一個解決方法就係租用迷你倉，增加額外空間去儲存物品。
3）更妥善存放珍藏
香港天氣潮濕，有啲珍藏物品存放喺家居未必係最妥善，除非你嚴格控制住室內溫度同濕度。反之，好多迷你倉都標榜有24小時冷氣同濕度控制，仲有保安系統，會比家居更適合存放一啲唔經常攞出來嘅收藏品。當然，太貴重嘅金銀珠寶就唔應該放喺迷你倉，而應該放去銀行保險箱啦！
4）商業上需要
對於一啲中小企，如果需要空間去保存文件、單據、記錄等，而本身辦公室唔夠位，咁迷你倉絕對係一個相宜嘅選擇。甚至有啲小商戶會租用迷你倉去存放貨品、材料等。
以下情況，你要諗一諗
1）存放你唔再需要嘅物品
其實我哋有好多嘢儲儲埋埋，實際上係唔再需要的。可能係一啲壞咗嘅小電器、一啲過期嘅印刷品，甚至係一啲「感情上嘅垃圾」（例如：前度嘅禮物、細個時嘅衫），基於種種原因我哋唔捨得丟棄，一直儲起。但如果搞到要付出額外租金去租迷你倉儲存呢啲物品，變相係浪費金錢。
2）真係需要長期租？
好多人租迷你倉，因為貪優惠，係唔係都租一年；又或者，租咗之後，個倉一直唔理，一年又一年咁租落去。其實真係要諗真啲，有冇需要長期租呢個倉呢？如果裏面塞滿晒物品你一直唔處理，長期你只係付出金錢去儲存一堆「廢物」。
3）真係需要租咁大？
迷你倉租幾大係悉隨尊便，不過租之前你應該諗一諗，係咪真係需要租咁大？因為個倉愈大、租金愈貴，如果你根本用唔晒個倉，等於白白交多咗租，小數怕長計。如果你需要儲存嘅只係一兩箱物品，可能迷你箱服務會更加適合你。
——
延伸閱讀：【我的 迷你倉 血淚史】4大迷你倉煩惱
緊貼Boxful Blog同Facebook Page，獲取更多家居生活貼士！