無論你係宅男抑或購物女王，買到一屋都係收藏品自然係人生一大滿足！不過你亦要面對一大問題：如何將你啲寶貝同珍藏儲存得最妥善？即使你家居有足夠儲存空間，但好多時大家都會忽略咗 家居儲存 嘅一啲潛在危機，分分鐘會令珍藏品受到無可挽救嘅損害，一失足成千古恨！
危機（1）高溫
近年夏季酷熱天氣頻頻出現，日間家居冇人而冇開冷氣、冇開窗通風，喺溫室效應之下，室內分分鐘可以有成攝氏40度以上！若儲存位置或房間溫度過高，對好多類型嘅物品都會有好大危機。例如塑膠製玩具模型，長期存放喺高溫之下有機會變形、出油，如果嗰盒係絕版玩具就真係會喊出嚟！而女士們嘅衣物、飾物、皮包等，都不宜存放喺高溫之下。
預防方法：冷氣。為咗保持儲存位置或房間有穩定嘅溫度，你甚至要考慮日間長開冷氣，將溫度設定喺攝氏24度。
危機（2）陽光
如果你家居嘅儲存位置附近係有窗，就要小心有陽光直射。同高溫危機類似，好多珍藏物品都好忌被陽光射到，除咗會直接提升咗室溫之外，亦有機會令紙製品、膠品、皮革品等等變色變形。
預防方法：盡量將儲存物品移離有陽光照射到嘅地方，而相關房間最好以厚窗簾布遮光。
危機（3）潮濕
香港春夏天氣潮濕，有時甚至會潮濕到牆身、地板出水！可想而知，潮濕係儲存品嘅最大敵人！書籍、黑膠碟、皮革等物品喺潮濕環境之下，容易發霉；衣物太潮濕，又會滋生衣蟲。總的一句，儲存物品的地方一定、一定、一定要保持乾爽，否則儲存品危矣！
預防方法：（1）利用各種抽濕物品（吸濕盒、活性炭等），置於儲存空間之內；（2）利用抽濕機為儲存物品之房間保持乾澡；（3）開冷氣亦可以同時有抽濕之效果。
危機（4）水災
家居何來「水災」？有時啲嘢真係好難講，無妄之災真係會發生。就好似超強颱風「天鴿」、「山竹」襲港之時，有朋友家居窗戶被吹至爆裂，本來嘅書房頓時變成澤國，好多藏書都救唔番。亦試過有朋友家居因樓上爆水管，牆身內嘅水管不斷漏水滲到樓下他的單位內，令牆同櫃都濕透。另一例子是因樓下單位嘅冷氣機風口長期對着天花板吹，以至樓上單位嘅地板因溫差而出水……
預防方法：防不勝防，自求多福。
危機（5）蟲災
因家居潮濕而滋生蟲患，如塵蟎、蟻、書蟲、衣魚、蟑螂等，都會對你嘅收藏物品造成一定程度的破壞。有朋友就試過，打開一盒很久沒有開啟過的Figure玩具後，發現內裏布滿蟲屍，而公仔的衣服亦已被蛀得體無完膚……
預防方法：做好家居防蟲工作，保持室內環境乾爽。
危機（6）寵物
如果你有養貓，實在不宜喺家居儲存珍藏品；應該話，任何你喺家居擺放出來或收埋嘅物品，你都要預咗會被貓破壞嘅一日。狗狗亦然，有時狗仔興奮起上來，或者喺家中無人之時，撞爛咬爛一屋物品常會發生！唔可以怪佢哋，因為佢哋亦唔係存心破壞，只係天性如此。
預防方法：養寵物前請三思；或要將寵物與收藏品完全隔離在不同房間。
危機（7）不速之客
所謂「不速之客」，未必係賊仔、竊匪咁嚴重嘅！大家時不時會見到一啲例子：有小孩子到訪家居，見到主人家一櫃都係模型，實在興奮，就一手去攞，結果……輕則損傷一兩件，重則成個櫃啲模型冧晒亦有！
預防方法：唔好請朋友去你屋企。
另類解決方案
想妥善保存你嘅珍藏品或寶貝，其實你可以考慮將一啲比較少會攞出嚟嘅收藏，以迷你箱嘅方式儲存。迷你箱嘅儲存環境，除咗保安嚴密、防火防水之外，亦有恒常溫度同濕度控制，絕對唔會遇上以上種種危機！如果你物品較多，幾個箱都唔夠裝，亦可以考慮用迷你倉嘅方式儲存，一樣經濟又妥善！
——
延伸閱讀：關於家居收納的 10本好書
延伸閱讀：【 蝸居 實用攻略】令家居有更大空間感的12個貼士
緊貼Boxful Blog同Facebook Page，獲取更多家居生活貼士！