出外旅遊除了要有假期、旅費、機票同酒店之外，最有乜嘢係重要？就係 行李喼 ／行李箱了！一個合適嘅行李喼，可以令你嘅旅程順順利利；反之，如果行李喼揀得唔妥當，佢引起嘅問題分分鐘為你嘅旅途增添不少煩惱！就等Boxful同你研究下，應該點樣選購行李喼啦！
1）先確定尺寸
行李喼尺寸有好多，你應該就住你嘅行程日數、當地天氣、旅行目的等等嘅因素，去決定所需行李喼嘅大細。
1至3日短程遊：喺機票咁平嘅年代，而家啲人隨時話飛就飛嚟個周末短線遊，呢啲情況其實一個20吋行李喼已經好夠你用，而且仲可以隨身登機，唔使寄艙，節省時間。
4至6日輕旅行：如果係4日3夜、5日4夜之類嘅行程，20吋喼未必夠用，可以考慮24吋喼。若然你預咗會有購物行程，咁不妨考慮20吋喼加24吋喼呢個組合。
7至14日長假期：出門一兩個星期咁耐，行李喼當然要有番咁上下大細，25吋至29吋都可以考慮，尤其係去天氣凍嘅滑雪之旅，更加要預空間放厚衫。
長期之旅：Working Holiday、留學，又或者去大量入貨，咁唔使多講，有咁大買咁大啦！不過，如果你係去長線自助遊，純粹觀光唔會買嘢，咁反而唔適合帶咁大個喼，24吋至26吋會比較方便。
2）行李喼質地
簡單嚟講，揀行李喼質地主要睇你想硬定軟。硬喼較堅固安全，但空間欠缺彈性；軟喼保護性較弱，但可以塞入更多物品。
最堅固質地——鋁鎂合金：保護性高，適合商務人士。但重量大，好容易刮花或撞凹。
輕盈質地——PC／PP：純PC喼重量輕有彈性，但有點脆，承受重擊度較低。PP喼就重少少，但耐撞擊性較好。兩者都有豐富嘅顏色選擇。
防刮質地——ABS：ABS襟刮，而且容易修補，但彈性較差。大尺寸行李喼唔建議買純ABS，可以考慮PC混合ABS質地嘅喼。
溫馨提示：無論你揀乜嘢質地，不妨選一個頻色特別嘅喼，方便你喺行李輸送帶上離遠就可以睇到！
3）轆的重要性
唔好睇小行李喼下面嘅轆，佢哋如果有問題，你嘅旅程都會出問題！
兩個轆：兩個轆嘅行李喼，只可以單方向拖行，相當費力。而家比較常見於20吋以下嘅行李喼。如果你買大過26吋行李喼，不建議揀兩個轆。
四個轆：係而家最常見嘅款式係可以360度旋轉嘅四輪款式，易推易拉。只要將拉桿伸到舒服的高度，就可以輕鬆推住行。
飛機轆：所謂飛機轆其實有8個轆，方便於較崎嶇嘅路面推行，尤其當行李過重，一般嘅轆會好難移動，但飛機轆就依然順暢。
4）喼鎖不可少
鎖匙鎖：簡單易開，但好容易唔見鎖匙。
密碼鎖：密碼唔易破解，只要自訂數字，唔使帶鎖匙，但遇上海關檢查有機會被破壞。
TSA海關密碼鎖：密碼難被破解，而且有一個標準海關鎖匙窿，海關要檢查時有萬能鎖匙開鎖，唔怕行李喼被夾硬開爛。
行李喼始終唔係你日日都要用嘅物品（除非你係成日要飛之人），太多行李喼放喺屋企係一個問題，又阻地方又唔美觀。如果有需要，可以搵Boxful幫你手，將啲少用嘅行李喼或雜物儲存，到有需要用先幫你送番上門！
——
延伸閱讀：【點只得一個箱？】 Boxful 三大類型服務睇真啲！
緊貼Boxful Blog同Facebook Page，獲取更多家居生活貼士！