對於好多不同年紀嘅人而言， 波鞋 已經唔係打波時先會著，而係日常出入必著嘅鞋類。部分人更加有收藏運動鞋嘅喜好，不時購買搜集特別版本嘅球鞋，甚至儲到一屋都係。之不過，好多人忽略波鞋嘅清潔同保養，又求求其其咁收納儲存，令到啲珍藏波鞋好快就舊化損壞，以至價值全失。等Boxful提點下大家關於波鞋嘅保養收納貼士啦！
波鞋之日常保養
想啲波鞋歷久如新，並唔係買佢哋返來一直收埋喺盒度唔著就可以。事實上，長期放喺鞋盒唔著嘅波鞋，喺香港嘅潮濕天氣之下，經歷若干日子之後仍然會舊化，或發霉或甩底，心愛之鞋頓成廢物。相反地，即使係經常著嘅波鞋，如果保養得宜，一樣可以日日如新、長著長有！以下幾點保養貼士，鞋迷必須留意。
1）波鞋需要「呼吸」
最簡單嘅事往往最易被人忽略。當大家著完一對波鞋，返家之後只要順手做一件簡單小事，就可以延長波鞋嘅夀命：除低雙鞋之後，將鞋帶全部鬆開，並將鞋舌盡量向前翻，讓波鞋可以「呼吸」，即係揮發波鞋內部嘅汗液。如果有鞋墊嘅話，最好亦將鞋墊攞出來散氣。因為我哋腳部分泌出嘅汗液會侵蝕波鞋、加速老化，所以讓波鞋唞唞氣，就係保養嘅第一基本步。
2）波鞋需要「做Spa」
清潔波鞋亦十分重要。好多人從來都唔會清潔腳上嘅一對波鞋，對鞋日日被街上塵土、泥濘及各種污漬侵蝕，好快殘舊，自然會縮短鞋齡。想對波鞋更襟著，就要適時進行清潔。最簡單做法，係用牙刷或抺布沾上清水，拭擦鞋面，可添上適量牙膏或經稀釋嘅白醋，之後再用清水抺拭乾淨。必要時亦可清潔埋鞋底。市面上有售各種專門清理波鞋嘅工具同清潔劑，使用起來亦相當方便。
3）波鞋需要定形及除臭
波鞋如果存放得唔好，受壓會好容易變形。如果存放之處空氣唔流通，亦會好快谷出異味。傳統方法係用報紙捲成球狀，塞入波鞋之內。而家市面上有售波鞋專用嘅除臭劑，有啲造成圓球狀，專門用來塞喺波鞋裏面，既可除臭又可防止變形。
波鞋之收納儲存
講到收納波鞋，好多人都係就咁一對對塞入鞋櫃，咁樣做當然唔係好方法。對於嗰啲屬於珍藏級數嘅波鞋，當然要有更妥善嘅收納儲存方式；即使係日常穿著嘅波鞋，都應該喺收納上多加注意，以保持佢哋在最佳狀態。以下係一啲收納貼士：
1）木質鞋櫃較理想：用來收納波鞋嘅鞋櫃，最好係木質，因為木造嘅傢俬較散氣通風。
2）波鞋專區：櫃內最好有放置波鞋嘅專區，將波鞋集中一齊存放，方便整理。
3）善用膠盒：透明膠箱或膠盒，係最理想放置波鞋嘅收納用品。有啲小膠箱大小剛好可以放一對鞋，好適合用來儲存珍藏嘅鞋款，而且盒身透明又方便搵鞋，一眼就望到。
4）除臭防潮：無論放喺鞋櫃或膠盒，波鞋嘅除臭防潮都要做到足。可以選用市面上售賣嘅各式防潮用品及除臭劑，亦可以DIY以天然物料自行製作。
5）透明收縮膜：某啲球鞋收藏家為咗想加強保護心愛波鞋，會用透明收縮膜將啲波鞋密封包到實。呢個毋疑係最好嘅儲存方法，因為波鞋被包實之後，不再接觸到空氣、水份、灰塵，又不會刮花，自然會保存到新嘅一樣。當然，包實嘅波鞋就真係唔會點攞出嚟著。
6）放入雪櫃？（未Fact Check）：坊間盛傳，波鞋收納嘅終極方法係將佢哋放入雪櫃，以低溫保存。咁樣可以減慢波鞋老化嘅速度。呢個方法都相當有道理，如果你屋企可以放到多一個雪櫃，不妨試試！
最妥善波鞋代存
唔係個個人都會用雪櫃去放波鞋，因為大家屋企根本就冇位放多個雪櫃！不過，如果你屋企已經儲咗好多波鞋或其他潮流物品，有需要搵額外空間去妥善儲存，可以搵Boxful幫手喎！將啲珍藏波鞋好好儲存喺額外空間，又唔使再霸佔屋企空間。無論你只係需要一個箱嘅額外空間，抑或你需要多個儲物房，Boxful唔同嘅Plan總有一樣啱你用，即刻睇睇啦！
Boxful 上門儲存月費優惠
上門迷你箱及上門迷你倉服務可享首月免費 $500 儲存月費優惠！
——
延伸閱讀：嚴選 黑膠唱片 收納產品
延伸閱讀：【搬屋收納必用】各式 儲物膠箱 大比併
緊貼Boxful Blog同Facebook Page，獲取更多家居生活貼士！