香港地小人多，居住環境狹窄，唔好話儲放閒置雜物，唔少人屋企連擺放洗衣機呢類日常必需家電嘅空間都唔夠。想騰出更多空間，除咗善用 儲存箱 同迷你倉服務外，近年興起嘅24小時 自助洗衣店 慳錢又慳地方，對唔少打工仔嚟講可以話係福音。究竟呢類 自助洗衣店 同傳統洗衣店有乜唔同？又可以點樣幫你慳錢、慳地方呢？等Boxful為大家逐一講解啦！
傳統嘅洗衣店有固定營業時間，又有店員幫你洗衫、乾衣提供一站式服務，為工作繁忙嘅港人帶來便利。不過相比之下，近年開到成行成市嘅自助洗衣店就更加方便快捷喇！
自助洗衣店特色多多
呢類洗衣店最大特色就係24小時營業，而且無店員當值，由洗衫到乾衣全部都係客人自己一手操作，以八達通付款。無論你幾夜收工都好，隨時落樓洗衫都冇問題。
自助洗衣店通常採用專業高效洗衣機，仲內設自動添加洗衣劑系統，操作簡單，令客人可以經濟實惠嘅價錢就享受到專業洗衣服務，連洗衣粉錢都慳番添！
部分公司為咗吸引更多客人，更增設其他額外服務，例如提供免費手機充電同免費Wifi，又喺店內設置扭蛋機、自動售賣機售賣飲品同小食，等自助洗衣乾衣嘅客人喺等候時可以解渴充飢，打發時間，服務相當周到。
圖片來源：水漾衣坊 Facebook
自助洗衣店興起因素
究竟點解近年多咗咁多自助洗衣店呢？其實主因都係因為而家嘅住宅單位面積太狹小。
先唔好講住劏房住客，家居得幾十呎。就算而家好多新建私人屋苑，上車盤實用面積愈起愈細，全屋動輒得嗰百幾方呎，真係空間買少見少，仲邊有位擺放洗衣機同晾衫呢？
再加上香港人工作繁忙，平日多早出晚歸。而傳統嘅洗衣店一般都喺8、9點就收鋪，遲收工嘅上班族根本趕唔切拎衫去洗，對24小時營運嘅自助洗衣服務嘅需求自然有增冇減。有商家就睇準商機，從海外引入24小時自助洗衣店嘅模式，以應付港人需要。
圖片來源：LaundrYup 洗得喜
愈開愈多如雨後春荀
而家全港各區都有多間自助洗衣店，好似陽光洗衣集團就於去年9月開始經營24小時自助洗衣店「Sunshine 24」，目前就喺大角咀、深水埗等各區開咗分店。此外，「水漾衣坊」同「LaundrYup 洗得喜」等都係香港常見嘅自助洗衣店。除咗商戶嘅直營店外，當中亦有唔少係以「加盟」方式投資嘅特許經營店。
有咗自助洗衣乾衣服務，就算屋企太細擺唔落洗衣機都唔驚啦！屋企不用放洗衣機，自然就能騰出更多空間。所以話，自助洗衣店同儲存箱服務其實係同出一轍，都係始於空間太少的問題，絕對可以話係親戚嚟呀！
（溫馨提示：你家居空間都係太細？Boxful嘅一站式上門儲存服務，提供多種儲物箱及迷你倉選擇，幫你收納日常生活中嘅閒置物品，仲有免費上門取送服務，即刻搵我哋幫手啦！）
——
緊貼Boxful Blog同Facebook Page，獲取更多家居生活貼士！