而家香港房屋問題解決無期，人人都但求有個「 蝸居 」棲身。尤其係年輕一族，唔理係租樓定係上車，都唔敢奢望會住得好大，即使係得百零二百呎的「蝸居」都收貨啦！面對愈來愈細嘅居住面積，大家唔使憂愁，只要諗諗辦法，盡量增加空間感，蝸居都絕對可以成為一個住得舒服嘅空間！
方法1）加建地台，增加收納位置
面積有限嘅小型單位，加建升高地台可帶來更多儲物空間。不少港人會將睡房地板全改成儲物地台，增加收納空間同時又唔影響觀感。
方法2）全開放式，空間感倍增
雖然冇咗牆身會減少私隱度，但面積細嘅蝸居有過多牆身間隔反而浪費室內空間，拆牆打通間隔絕對可以令空間感變大同增加實用性。不過，要留意主力牆絕對唔可以拆同埋要符合消防條例。
方法3）善用牆身，改建為儲物空間
如果希望保留私隱，不妨考慮以內置衣櫃嘅牆壁作為客廳和睡房嘅間隔，除咗可以免除浪費牆身所佔去的面積外，亦可增加收納空間。
方法4）變形傢俬，減少佔地空間
擺咗傢俬後再冇足夠活動空間？變形傢俬可以幫到你！喺唔改動屋內裝潢嘅情況下，一啲多用途傢俬（如書枱可以變單人床、儲物櫃可變餐枱等）可有效同靈活咁運用有限嘅空間。各大傢俱連鎖店有好多呢類型產品，雖然價錢會比一般傢俬貴，但相對於慳咗嘅裝修費同可賺到嘅空間絕對值得。
方法5）斷捨離：唔要嘅嘢統統捨棄！
家居空間咁有限，又有好多物品唔捨得丟棄，搞到間屋總係亂糟糟？不妨參考近年興起嘅日式生活哲學「斷捨離」大法，意指「斷絕不需要的東西，捨棄多餘的廢物，脫離對物品的執着」，主張大家只保留當下有用嘅物件，對於唔捨得丟棄嘅物件，如朋友送嘅禮物、旅行手信、中學時代收藏嘅漫畫等，亦要果斷清理！如果你遵行「斷捨離」大法，再養成定時整理家中物品嘅習慣，你家居嘅空間感一定大大改善！
以上5大方法，可以令你嘅「蝸居」住起上來冇咁逼夾，同時又有更多儲物空間。如果你嘅「蝸居」實在唔夠位放物品，而該些物品又真係不能捨棄？咁就考慮搵Boxful幫你手啦！
（原文參考：MoneySmart）
——
延伸閱讀：【搬屋收納必用】各式 儲物膠箱 大比併
緊貼Boxful Blog同Facebook Page，獲取更多家居生活貼士！