Boxful早前同大家研究過點樣喺收納夏季衣物前做好一啲處理步驟，以令到啲衣物保存得更好。你又有冇試過，將啲 冬季衣物 攞出來時，發現啲衫出咗事呢？相對嚟講，冬季厚衫嘅夀命比夏天衫更加長（一般都會著多幾年），所以佢哋嘅保存係更加重要。今次又睇下，點樣做好冬季衣物嘅處理、延長佢哋嘅夀命！
皮褸
皮褸一般來講都比較昂貴，如果保養做得唔好，一攞番出來見到啲皮裂晒，真係心痛！原來，皮褸保養要訣，係要盡量多啲著！長期唔用掛喺櫃入面，皮質會變硬，然後太熱或太凍都會好容易裂開。而陽光同水，就係皮褸嘅兩大敵人；平時穿著時都要避免陽光直射，一旦淋濕就要即刻抹乾。
皮褸亦唔可以水洗或乾洗，只可以用專門清潔皮革嘅清洗劑去抹走表面污漬，再用皮革護理劑去增加光澤。
羽絨褸
好多人以為羽絨褸一定要乾洗，其實係可以水洗嘅，不過洗嘅時候唔好用手搓，咁會令到入面啲羽絨移位，變成一舊舊咁。羽絨褸表面嘅污漬，可以用刷擦甩同過水。另外，千祈唔好用洗衣機高速轉乾，只要用手擠走褸中嘅水分，將佢掛喺通風處晾乾就可以，必要時都可以用乾衣機。但一定要徹底晾乾，否則好易會生蟲。記住，掛羽絨褸最好用承重力好嘅加闊木質衣架，以免肩膊位變型。
羊毛衫
雖然羊毛衫最好都係乾洗，但水洗的話只要方法正確，一樣可以保養得好好。簡單嚟講，方法就係用冷水、手洗，並且用溫和嘅洗衣液或者專用嘅清潔劑（甚至用嬰兒洗頭水都得）。手洗嘅時候唔可以大力搓，要慢慢擠；之後用一塊大毛巾盡量吸走水分，再放在通風地方攤乾或晾乾。
厚重嘅羊毛衫要注意，懸掛時好易下垂變形，肩膊被衣架頂到起角。所以最好都係平放疊存。
麖皮／絨面衫
麖皮同絨面質料其實比皮質真難打理，水同油都係佢哋大敵！而且因為表面有密集纖維，容易積塵。清理方法係用刷子加風筒，一邊擦一邊吹（冷風）。之後再用小刷順住絨毛梳理。為咗盡量避免沾上污漬，麖皮衣物最好預先進用防水處理（如使用防水噴霧）。
記得以上嘅冬季衣物處理貼士，再配合最佳嘅儲存方式，就可以令到佢哋日久常新！如果你需要額外空間幫你喺不同季度儲存四季衣物，Boxful可以好靈活咁幫到你！
——
緊貼Boxful Blog同Facebook Page，獲取更多家居生活貼士！