近期天氣潮濕，大家在收納換季衣物同家居雜物之時，有冇注意埋 防潮 措施呢？好多時我哋就咁將衣物雜物放入膠箱，然後就咁塞上櫃頂、床底，忽略咗要配合埋防潮用品，結果日後開箱之際就悔恨太遲，分分鐘發咗霉都唔知！所以Boxful提提大家， 防潮 工夫不可忽視，只要認識以下5大吸濕法寶，就唔使再怕物品發霉！
5大防潮吸濕用品
1）防潮珠
防潮珠其實係硅膠（Silica Gel），係簡單又常用嘅防潮用品。一般防潮珠都係藍色嘅，吸咗水就會變成紅色，雖然吸濕能力唔算強，但就勝在夠晒經濟實惠。無論係放喺食物包裝內定自己買番嚟嘅防潮珠，只要係硅膠就可以重用。重用方法好簡單，只要將用過嘅防潮珠放入微波爐或者用風筒吹收數分鐘，就有可能變番做藍色循環再用。市面上好多防潮珠都係袋裝或細盒裝，好適合放入衣櫃或膠箱吸濕。
2）防蟲劑 / 樟腦丸
為咗防治衣物蟲害同發霉，唔少人都會喺衣櫃或者儲物箱中放樟腦丸。不過用嘅時候要留意，好多樟腦丸都含有二氯苯，具有微毒，摸完之後記得要洗手。絲、毛類衣服好易被蟲蛀，但為免衣物變黃，最好避免直接將樟腦丸放喺衣物上。用白紙或布袋仔將樟腦丸包好，再放喺櫃桶/膠箱嘅四角。想將衣物拎出來著時亦最好先放喺陰涼處涼曬，讓氣味擴散。
3）活性炭
活性炭種類繁多，原料包括木、竹或者椰殼等，經過活化處理後可以吸濕防霉。雖然活性炭嘅吸濕功能冇其他吸濕劑咁好，但就可以除臭。潮濕嘅天氣令衣物要更多時間至乾透，容易誘發霉菌生長發臭，加入含活性炭嘅產品就可以幫手吸走臭味。
4）竹炭
經過炭化處理而製成嘅竹炭，可以吸濕除臭之餘，仲可以殺菌驅蟲，不過吸濕能力一般，比較適合用於細小嘅儲存空間。只要將竹炭放入布袋，就可製成防潮袋。竹炭使用咗一段時間後可以放喺太陽下曬2 – 3日就可以循環再用。
5）氯化鈣（Calcium Chloride）
係常用嘅乾燥劑，吸濕力強，好多吸濕盒裏面都係使用氯化鈣。根據過消費者委員會嘅調查顯示，含氯化鈣嘅吸濕劑吸濕能力比硅膠、竹炭同活性炭高。不過氯化鈣吸濕劑用完之後唔能夠循環再用，所以要記得定時更換。
使用防潮用品小貼士
1）收納儲存雜物時，記緊要確保該些物品已經完全乾燥（例如剛洗完的衣物要乾透），才好放進櫃內/箱內，然後再加進防潮物品。有些人以為屋企或迷你倉有開冷氣就唔緊要，但如果物品本身有濕氣，濕氣被封在櫃內/箱內更難揮發，一樣有可能發霉。
2）儲存收納一啲貴重或者對濕氣敏感嘅物品，例如相機、漫畫、書、絕版玩具等收藏品，則吸濕用品真的不能少！雖然加入吸濕用品係有一定成本，但唔好因小失大。
3）市面上大部分吸濕用品都有標明有效使用期（如3個月），應按照使用期定時更換吸濕物品，以保持最大的吸濕能力。
4）把吸濕物品放入櫃桶/膠箱時，要小心放好，盡量不要直接接觸到儲存物品。尤其吸濕盒要平放，避免盒內水分沁漏。
想衣物雜物保存得更好，可以考慮用迷你箱的方式存放！即刻搵我哋幫手啦！
——
緊貼Boxful Blog同Facebook Page，獲取更多家居生活貼士！