相信唔少人都試過，去旅行臨出發前至發現行李箱壞咗，又或者尺寸唔啱，搞到要臨時臨急問親友借喼。香港人雖然熱愛旅行，但行李篋價錢往往過千元又「掗拃」，總不能每次外遊就買個新喼。近年就有公司就睇準呢點，提供唔同品牌行李箱嘅出租服務，慳錢之餘，最重要嘅係唔怕屋企冇空間存放。Boxful今次就同大家剖析下市面上唔同公司嘅 租喼 服務，幫你搵出邊間最啱你！
1）JOYO租遊（Rent-a-Suitcase租遊列國）
「租遊列國」算係香港較早開始提供 租喼 服務嘅公司，主要提供著名品牌不同系列嘅行李箱，包括好多明星都愛用嘅Rimowa、世界最大行李箱品牌Samsonite同德國經典品牌Travelmax。呢類行李箱原價高達$5,000 – $8,000，但而家只需每日約$45 – $90就可以租到。
租喼時記得要提早至少3日網上預約，再用信用卡網上或親臨店舖付款。由於「租遊列國」唔包上門服務，所以租客一係要親自落銅鑼灣攞喼，一係就要俾多$100速遞，相對冇咁方便。不過，好在「租遊列國」本身亦有唔同優惠折扣，租金滿$300即享免來回運費，如果租期較長，亦有8折 – 9折優惠。
Facebook：www.facebook.com/joyo.world
2）租喼JoGeep
有別於一般出租行李箱公司要求客人支付過千元按金，「租喼JoGeep」唔收取按金，只係要求客人必須購買旅遊保險，對雙方都有保障。此外，客人只要租喼期唔少於3日，就可以免費送貨上門，夠晒方便。「租喼JoGeep」亦有提供可帶上機艙嘅超小摺疊Yoyo嬰兒車，啱晒想帶埋小朋友一齊出國旅遊嘅家長。
Facebook：www.facebook.com/jogeep
3）JOGIP
同其他租喼公司相比，JOGIP只提供American Tourister嘅硬喼同軟喼款出租，選擇較少，不過日租只係$50，而且接受銀行轉賬或者網上信用卡付款，再加上JOGIP可以喺港鐵沿線交收，如果想上門送貨亦只係收$30，不失為經濟實惠嘅選擇。
網站：jogip.hk
Facebook：www.facebook.com/jogiphk
4）Suitcase Now
SuitcaseNow清一色提供Samsonite Firelite嘅行李箱出租服務，而且只有大（30吋）、中（25吋）同小（20吋）等3款尺寸，選擇唔多。價錢分別為$39、$38同$42，算係相當實惠，而且呢款喼勝在保護力強又輕身，好用又唔怕咁易壞。
網上預約後可以即時網上付款。要留意嘅係求租喼時SuitcaseNow會要求客人支付$1,000嘅按金，但只要提供旅遊保險副本就可以獲豁免按金。SuitcaseNow提供免費送貨服務。不過，由於離島區、元朗區、屯門區同北區就唔包，住喺以上地區嘅朋友可能要另揀取喼地點。
Facebook：www.facebook.com/suitcasenow
5）Esondata易訊數據
「Esondata易訊數據」主要提供數據卡同Wifi蛋嘅租借服務，不過原來連行李箱都有得租！Esondata只提供Rimowa唔同類型嘅行李箱，日租由$45 – $88不等，可以選擇現金、銀行轉賬或網上信用卡付款。至於交收方法，則可以選擇去銅鑼灣或荔枝角門市、指定交收站，又或者機場郵政局自取。
Facebook：www.facebook.com/esondatahk
行李箱唔係成日用，租喼係一個好選擇。但如果你家中已經有一堆行李篋，唔係成日用又阻住晒啲地方？最好就用來儲起啲雜物，然後存晒入倉啦！不妨搵Boxful幫幫手，幫你騰出更多家居空間！
——
延伸閱讀：【生活專訪】3位 收納達人 的執屋貼士
緊貼Boxful Blog同Facebook Page，獲取更多家居生活貼士！