夏天臨近，相信大家已經不經不覺換咗季，又或者已經出動選購今夏新裝。有冇發現，屋企個 衣櫃 似乎唔多夠位？係時候趁開季之際，實踐一下「斷捨離」嘅原則，清一清個衣櫃。其實只要你認真啲睇睇，你個衣櫃之中有好多衣物都係應該放棄嘅，不論你係男士女生，都要留意以下呢個清單！
1）「那些年」的衣物
好多人嘅衣櫃裏面，仲會Keep住好多好舊好舊嘅衫，例如少年時期成日着一件好Rock嘅褸，或者少女時第一次去Ball着嘅嗰條裙……呢啲衣物雖然係大家青春回憶嘅見證，問題係：你仲會着嗎？唔會！清理衣櫃第一件事，就係丟棄呢批超舊嘅衫。記住，你家居嘅儲存空間有限，但腦海嘅記憶空間無限，要留住回憶只需影番張相、留在心中。
2）當瞓覺衫的衣物
好多人都習慣咗，着一啲舊Tee恤或背心瞓覺，而唔會正正經經買套睡衣。咁做其實冇乜問題，只要自己瞓得舒服就可以。但係，好多人着開呢種「瞓覺衫」會有個惰性，就係啲衫着到又穿又爛都繼續着，心諗「只係瞓覺衫啫」。建議大家，真係爛咗嘅「瞓覺衫」就應該及早丟棄，唔好愈積愈多。當然最好都係着番睡衣啦。
3）有少少損壞的衣物
大家衣櫃中一定有一啲已經有缺憾嘅衫，可能係洗爛咗少少、甩咗粒鈕、沾咗少少漬洗唔甩……之類，成日都諗住會處理，睇下幾時攞去搵人修補、處理，但就一直冇時間去做。老老實實，你真係會的起心肝嗎？一直唔處理，呢批衫只會被埋在一角，因為你根本不會想再着。咁不如爽爽快快決定放棄，為衣櫃騰出空間吧！
4）幾年冇着過的衣物
得閒審視一下你衣櫃中嘅每一件衫，諗一諗：呢件衫我有幾耐冇着過？如果上季有着過，就可以留；如果有兩季或以上都冇着過，咁其實好大機會你以後都唔會再着。咁點解仲要留住呢？
5）尺碼不合的衣物
衣不稱身絕不是好事。好多時大家買衫都會先試身，但而家網購流行，有時收到啲衫先發覺唔太啱身，往往會亦費時退換，就將之放埋一角。如果件衫Size買細咗，你會着嘅機會係近乎零。如果件衫太大，夾硬着又會太鬆唔好睇。與其白佔衣櫃空間，不如早啲處理咗佢。
6）同款同色的衣物
有啲人有呢個習慣，睇啱一款衫，就鍾意同款買幾件，通常係買唔同色。另外一個類似行為，就係某一輪自己鍾意着某一類衫（例如淨色Tee），就會不斷搜購，買到一櫃都係。若干時日之後，你會發現喺嗰一批衫之中，你往往只會經常着其中兩三件，絕對唔會件件都鍾意着；換言之，少着嗰啲真係唔應該買。既然都少着，倒不如放棄吧，留番你最經常着嗰幾件就乜都夠啦！
7）買回來從未着過的衣物
有冇發現，衣櫃中有啲衫買番來從未着過，甚至連牌仔都未剪，100％新淨，一直就掛咗喺度唔知做乜？與其讓佢繼續喺衣櫃內虛度餘生，不如考慮將佢放上拍賣網或FB Marketplace賣咗佢套現好過啦！
8）不再喜愛的衣物
人嘅喜好同口味會變，有啲衫即使曾經係你至愛，或許總有一日你會不再寵幸、唔想再着。毋須問原因，更不必內疚，應該早日將呢啲衫清走，舊嘅唔去新嘅唔來！
以上建議你盡快「放棄」嘅各類衣物，當然「放棄」亦有好多不同處理方式，例如轉贈親友、攞去二手Group賣、捐贈俾相關機構等等，唔一定下下要將之變成垃圾。
為咗騰出家居空間、保持衣櫃整潔，每次換季前，就應該咁樣為衣櫃優化一次。如果有啲衣物真係有需要保留，但又唔想佢哋霸佔衣櫃，咁Boxful嘅「標準儲物箱」同「掛衣箱」服務就一定可以幫到你！
——
緊貼Boxful Blog同Facebook Page，獲取更多家居生活貼士！