夏日炎炎，想家居保持涼快舒適，冷氣機自然不可少。然而，風扇作為比較慳電同環保嘅電器，亦係一個相當好嘅選擇，好多時以風扇配合冷氣機一齊使用，降溫效果會更加理想，既可以提升舒適度，亦可以幫你節省電費。市面上嘅風扇種類繁多，令人眼花繚亂，Boxful就同大家認識下風扇嘅不同種類，同埋提提大家一啲 選購風扇 時要注意嘅事項。
家居風扇6大種類
1）座地扇／落地扇
有固定底座，並以直杆連接風扇主體，可調節高度。呢類座地扇／落地扇係最常見嘅風扇，風力大之餘，轉向角度亦廣，適用於較大嘅空間，通風同降溫效果都比較好。
2）直立式風扇／塔扇
外形係直立式柱狀，會比較慳地方，透過內部風輪轉動而出風，出風量少而風力較柔和，送風範圍不大，適用於較細嘅空間。
3）無葉式風扇
出風口中空而冇任何風葉，係近年相當流行嘅風扇種類。佢原理係以風扇下方嘅渦輪吸入空氣，再從環型出風口送風，風力穩定自然，噪音很低。而因為冇風葉，亦避免了灰塵積聚，對兒童亦相當安全，因而很受歡迎。
4）對流風扇／循環扇
一般配合冷氣或暖氣使用，加快空氣流通並促進室內空氣循環，適用於較不通風嘅空間，可快速讓冷氣或暖氣遍布房間。
5）鴻運扇
泛指方型窄身嘅座枱／座地風扇，中間嘅圓形送風槽可以轉動，功能與對流風扇相似。因為慳地方，亦曾經相當流行。
6）掛牆扇／吊扇
掛牆扇安裝於牆身，而吊扇則安裝於天花板，兩者都係較舊式嘅風扇，好處係慳地方，送風範圍亦大，但清潔較不方便。
選購風扇 應注意6大要點
1）風扇有幾多塊扇葉
一般平民化價格嘅風扇係三片葉或五片葉，而高價嘅風扇則可能會有五片、七片甚至九片葉。簡單而言，扇葉愈多，因為扇葉面積細咗，出風會更均勻同柔和，而且噪音亦會較細。
2）微風功能是否理想
風力愈大就愈好？都未必。一啲平價嘅風扇，風力即使調校到最細嘅微風，風力都可能會過大，好易吹亂家中物品，或者吹住瞓覺都會太大風。而一啲較貴價嘅風扇，就會有較理想嘅微風設定，吹出嚟嘅微風風力適中，更加舒適。所以喺選購時，除咗試下最強風力夠唔夠之外，亦要試埋最弱風力是否夠「弱」。
3）宜選DC直流電風扇
DC直流電風扇，內部以高效永久磁鐵取代傳統銅線，通電後以電流磁效應原理帶動扇葉轉動。相比起傳統AC交流電風扇，既節省2/3能源，摩打運轉壽命亦高出數倍。故如果有得揀，最好選購DC直流電風扇嘅機種。
4）留意高度同風向
當你為家居選購風扇，喺唔同嘅空間環境會有唔同嘅需要，例如要吹向高處定低位、是否要吹遍房間每一角等。因此喺選購時，要因應需要留意番風扇嘅高度同送風方向調節，係咪切合所需。例如，放置喺客廳嘅大風扇，就應該選擇送風角度夠廣嘅型號。
5）測試運轉聲音
無論係幾靜嘅風扇，運轉時點都會有少少聲音，尤其喺夜晚瞓覺之時，少少聲都會變得大聲咗。每個人對噪人嘅接受能力同敏感度都唔同，所以選購風扇一定要試一試佢運轉時嘅聲音有幾大，又會唔會有啲好突兀嘅聲音。
6）有何附加功能
而家有啲風扇附有好多功能，最簡單例如時間掣、遙控器，甚至乎更先進嘅自動感溫調節風力、空氣清新、空氣加濕等等，應有盡有，亦十分有用。但購買時要清楚自己是否有需要用到呢啲功能，始終功能愈多就愈係昂貴，同時亦有可能比較容易壞。
屋企冇位擺放風扇？咁真係要檢視下，有冇啲乜嘢雜物，可以收納得好啲甚至存放喺額外空間？Boxful嘅各類型儲存方案，或者可以幫到你！
——
延伸閱讀：【抽濕攻略】家用 抽濕機 選購Guide
緊貼Boxful Blog同Facebook Page，獲取更多家居生活貼士！